Thursday, January 28, 2010

மாறா மன ஆட்சி....

பிடிவாதமும்
சுயநலங்களும்
பேயாய் என்னைத்
தொடர

வலுவிழந்த ஒற்றை உயிரோடு
நிழல் தேடி ஓடுகின்றேன்.....

காற்று அடைத்த
கங்குல் நிஷ்டையில்
ஓயாத அசரீரியாய்
அந்த வார்த்தைகள்......

துவண்டு தோள் தளர்ந்து
உயிர் விழ....
பிம்பங்கள் அறுத்தெறிந்து
எண்ணம் முறுக்கி
விடைத்தெழ.....

உருண்டோடும் இறந்தகாலத்தை
தோண்டியெடுத்துக் கொண்டு
மீண்டும் எட்டிப் பார்க்கும்
பிடிவாதமும்
சுயநலங்களும்...........

Tuesday, January 19, 2010

ஜனநாயகத்திற்கு ஒரு கடிதம்.................


அன்புள்ள ஜனநாயகத்திற்கு,

ஜனநாயக நாடொன்றின் குடிமகன் எழுதிக் கொள்வது. நலம், நலம் அறிய ஆவல் என்று தொடங்க முடியவில்லை. நீயில்லாத நாட்டில் நாங்கள் நலமோடு இருப்பது என்பது வெறும் கற்பனைதான். நான் பிறந்து கால் நூற்றாண்டுகளாகிவிட்டது. ஜனநாயகம் என்ற சொல்லை கேள்விபட்டு ஒரு தசாப்தங்களுக்கும் மேல் ஆகிவிட்டது. புத்தகங்களிலும், வரலாற்று நூல்களிலும் மாத்திரம் தான் அது எப்படி இருக்கும் என்று அறிந்துள்ளேன். இந்த நாட்டில் உனக்காக காத்திருக்கும் இலட்சம் பேரில் நானும் ஒருவனாக மாறிவிட்டேன். நீ இருப்பதாகவும், நாடெங்கும் நீக்கமற நிறைந்திருப்பதாகவும் பலர் பேசிக் கொண்டும், எழுதிக் கொண்டும்தான் இருக்கின்றார்கள். ஆனால், நான் ஒருபோதும் கண்டதில்லை. இந்த நாட்டின் பல பகுதிகளுக்குச் சென்று வந்திருக்கின்றேன். அந்தப் பகுதிகளில் எல்லாம் உன்னை தேடிப் பார்த்திருக்கின்றேன். பலருக்கு உன்னைப் பற்றியே தெரியாது. பலருக்கு உன்னை காண ஆவல். பலருக்கு உன்னைப் பற்றி பேசினாலேயே வெறுப்பாக இருக்கின்றது.

என் அப்பா, அவரின் அப்பா என்று எல்லோரிடமும் கேட்டுவிட்டேன் உன்னைப்பற்றி. ஆனால் எவரும் உன்னைப் பார்க்கவில்லை. அதனால் தான் நேரடியாக உனக்கே இந்த கடிதத்தை எழுதிவிடத் துணிந்தேன். எப்படியும் உன்னைத் தேடிக் கண்டுபிடித்துவிட வேண்டும் என்ற ஆவல். உன்னைப் பற்றி பல தலைவர்கள் பேசுவதைக் கேட்டிருக்கின்றேன். ஆசையாகத் தான் இருக்கின்றது உன்னைப் பார்க்க. எனக்கு இன்றும் நல்ல நினைவு இருக்கின்றது. உன்னுடைய அம்சமாக கூறிக்கொள்ளும் தேர்தல் பொழுதொன்றில் வீட்டில் இருந்த என் பாட்டனிடம் போய் உன்னைப் பற்றி விசாரித்தேன். மிகவும் விரக்தியாக “குழி தோண்டிப் புதைத்துவிட்டார்கள்” என்றார். “அப்படியானால் உன்னைப் பார்த்திருக்கின்றாரா” என அவரிடம் மீண்டும் கேட்டேன். பிறந்த அன்றே சுவாசிக்கக் கூட அவகாசம் இன்றி இறந்துவிட்டதாக அவர் கூறினார். அவதாரங்களைப் பற்றியெல்லாம் இந்த உலகில் பலர் பேசிக் கொண்டிருக்கின்றனர். உன் அவதாரங்கள் சில உலக நாடுகளில் உலா வந்ததாகவும் வரலாறுகளில் படித்திருக்கின்றேன். எமது நாட்டைப் பற்றி உனக்கு தெரியாதது அல்ல. இப்போது நீ அவசியமாக இங்கு தேவை.

இன்னும் எத்தனை நாட்களுக்கு இப்படியே மௌனம் காக்கப் போகின்றாய்? உன்னைப் பற்றி பேசிப் பேசியே இங்கு பலர் தலைவர்களாகி விட்டார்கள். ஆயுத முனையில் அமைதி பேசிக் கொண்டு, அதற்கு உன் பெயரை கூறி வருகின்றார்கள். அவர்களின் பேச்சு வல்லமைகளில் நீ பிராசரத்திற்கான கருவியாக மாறியிருப்பது வேதனையாக இருக்கின்றது. உன் எதிரிகள் உந்தன் பெயரில் குளிர்காய்ந்து கொண்டிருக்கின்றார்கள். உந்தன் பெயரில் பல நிறங்களில் வாழ்ந்து கொண்டிருக்கும் பலர், இடாம்பீக வாழ்க்கையில் திளைத்துக் கொண்டிருக்கின்றார்கள். ஆனால், உன்னையே நம்பிக் கொண்டிருக்கும் பலர் உன்னைப் பற்றி பேசுவதற்கே அஞ்சியிருக்க வேண்டிய சூழ்நிலை.

எல்லாத்தையும் மீறி நீ வருவாய் என்ற நம்பிக்கையில் பல தலைமுறைகள் காத்திருந்தும், நீ கல் நெஞ்சம் கொண்டவனாகவே இருக்கின்றாய். இன்னும் எத்தனை தலைமுறைகளுக்கு இந்த காத்திருப்பு தொடரப் போகின்றது. உன் மௌனம் இன்னும் நீண்டால் நாங்கள் கூடி வேறு வழிபற்றி சிந்திக்க வேண்டியிருக்கும். இது உனக்கான இறுதி அழைப்பு அல்லது இறுதி எச்சரிக்கை. எப்படி வேண்டுமானாலும் எடுத்துக் கொள்ளலாம். ஆனால், உனக்காக இன்னும் நீண்ட நாட்கள் நாங்கள் காத்திருப்போம் என்று நீ எண்ணியிருந்தால் அது வீண் கற்பனை மாத்திரமே.

இந்த மடலை தந்தி போல் பாவித்து பதில் அனுப்பு.
நன்றி,
ஜனநாயக தேசத்தில் வாழ துடிக்கும் ஒரு குடிமகன்.

Saturday, January 16, 2010

ஒரு ஆட்டு(சி)க் கதை......

ஒரு ஊரிலே, பல வெள்ளை ஆடுகளும், சில கறுப்பு ஆடுகளும், சில பழுப்பு நிற ஆடுகளும்,இந்த நிறங்கள் கலந்த ஆடுகளும் இருந்தன. நீண்ட காலமாக ஒன்றாகித் திரிந்த இந்த ஆடுகளுக்கு திடீரென ஒரு தலைவன் தேவைப்பட்டான். எல்லா ஆடுகளும் ஒன்று கூடி நடந்தும், கிடந்தும், படுத்தும், பாய்ந்தும், மேய்ந்தும் சிந்தித்தன. இறுதியில் எல்லாம் கூடி தேர்தல் ஒன்று நடத்துவதற்கு முடிவெடுத்தன.

ஏற்கனவே வெள்ளை ஆடுகளுக்கு தலைவனைப் போல் இருந்த ஆடு, போட்டியின்றி வெற்றி பெறலாம் என நினைத்திருந்தது. ஆனால், இன்னொரு வெள்ளைஆடு, இன்னும் சில வெள்ளை ஆடுகளுடன் சேர்ந்து வேறொரு வெள்ளை ஆட்டை தேர்தலில் போட்டியிட வைத்தது. இதை பார்த்துக் கொண்டிருந்த இன்னும் சில வெள்ளை ஆடுகளும் போட்டி போடுவதற்கு முன்வந்தன. தனித்த ஒரு கறுப்பாடும், சில பழுப்பு ஆடுகளும் கூட போட்டியிட முடிவு செய்து களமிறங்கின.

போட்டி சூடு பிடிக்க ஆரம்பித்தது. வீதிகளில் காகிதம் உண்ணும் ஆடுகளுக்கு, வீடு தேடி புல்லும், தரமான புண்ணாக்கும் கிடைக்கும் எனவும், ஆடுகளுக்கு சிறந்த பட்டிகள் கிடைக்கும் எனவும், புதிதாய் புல் நிறைந்த வெளிகள் உருவாக்கப்படும் எனவும் வாக்குறுதிகள் அள்ளி வீசப்பட்டுக் கொண்டிருந்தன. தேர்தல் பிரசாரங்கள் முடக்கி விடப்பட்டன. ஒட்டப்படும் பிரசார சுவரொட்டிகள் ஏனைய கட்சி ஆதரவு ஆடுகளால் மேயப்பட்டன. சில ஆடுகள் கைகலப்பிலும் ஈடுபட்டன. சில கறுப்பு ஆடுகள் ஒரு வெள்ளை ஆட்டையும், மற்றும் சில கறுப்பு ஆடுகள் வேறொரு வெள்ளை ஆட்டையும் ஆதரிப்பதாக அறிவித்தன. கறுப்பு ஆடுகளின் கோரிக்கைகளை நிறைவேற்றித் தரும் ஒப்பந்தங்கள் கைச்சாத்தாகின.

கறுப்பு ஆடுகளை ஆதரிப்பதாக கூறி பல ஒநாய்கள் உலகெங்கிலும் இருந்த பட்டிகளில் இருந்து வந்தன. வெள்ளை ஆடுகளுக்கு ஆதரவாய் சில ஒநாய்களும் வந்தன.

தேர்தல் நெருங்கி வந்தது. தேர்தல் நடைபெற்றது. பல ஆடுகள் வாக்களிக்கச் சென்றன. சில ஆடுகள் வாக்களிக்காது இருந்தன. வாக்களிப்பு முடிவுகள் வெளிவந்தன. கறுப்பு ஆடுகளுக்கும், பழுப்பு ஆடுகளுக்கும் பெரும் ஏமாற்றம். வெள்ளையாடொன்று தலைவன் ஆனது.

காலங்கள் போனது. மீண்டும் தேர்தல் வந்தது. மீண்டும் கடும் பிரசாரம். கடும் போட்டி. மீண்டும் கறுப்பு ஆடுகள் வெள்ளை ஆடுகளுடன் ஒப்பந்தம் போட்டன. தேர்தல் வந்தது. வெள்ளை ஆடொன்று வெற்றி பெற்றது. காலம் கடந்தது.

வெள்ளை ஆடுகளே, வெள்ளை ஆடுகளாக இருந்தன. கறுப்பு ஆடுகள் கறுப்பு ஆடுகளாக மட்டுமே இருந்தன. வெள்ளை ஆடுகளே தலைவனாக இருந்தன. கறுப்பு ஆடுகளும், பழுப்பு ஆடுகளும் தேர்தல் காலங்களில் ஒப்பந்தங்களில் கையெழுத்திட்டும், முழக்கமிட்டும் கொண்டிருந்தன. இறுதியில் கறுப்பு ஆடுகளும், பழுப்பு ஆடுகளும் மேலும் பல வெள்ளை ஆடுகளும் உண்பதற்கு காகிதங்களும் இல்லை. புல்லும் இல்லை. பழுதாய்ப் போன புண்ணாக்குத் தானும் இல்லை. அடுத்த தேர்தலுக்காக காத்திருக்கின்றன.

பிரசார சுவரொட்டிகள் கொஞ்சமும், பிரசார வாக்குறுதிகள் கொஞ்சமும் உண்ணக் கிடைக்கும் என்ற ஆசையில். காலங்கள் கடந்து கொண்டிருக்கின்றன. வெள்ளை ஆடுகள் வெள்ளை ஆடுகளாக மட்டுமே இருக்கின்றன. கறுப்பு ஆடுகளும், பழுப்பு ஆடுகளும் மாறிமாறி வெள்ளை ஆடுகளை ஆதரித்துக் கொண்டிருக்கின்றன.

தேர்தல் காலங்களில் மட்டுமே புல்லும், புண்ணாக்கும், குறைந்தபட்சம் காகிதமும் கிடைக்கின்றது. அதனால், காலம் முழுதும் தேர்தல் காலமாக இருக்கக் கூடாதா என அப்பாவி கறுப்பு ஆடுகளும், அப்பாவி பழுப்பு ஆடுகளும், ஏன் சில வெள்ளை ஆடுகளும் கூட எண்ணிக் கொண்டிருக்கின்றன.

எல்லாம் முடிந்த பிறகும் ஒநாய்கள் எதுவும் போகவில்லை. இன்னும் இருந்தன.பல ஒநாய்கள் வெறியோடு காத்திருந்தன. ஆடுகள் அடிபட்டு சாகும் வரை அமைதியாக.

இது முழுக்க முழுக்க ஒரு கதை எழுதும் முயற்சியே. எந்தவிதமான அரசியற் கலப்பும் அற்றது. அற்றது. அற்றது.

LinkWithin

Related Posts with Thumbnails